قعدت انا وصاحبى جنب النيل
فوق سور
حكا لى عن الجمال حكاوى
وكمان عن الزهور
وعن التعبانين وال مهاجرين
وعن الطيبة والشرور
وقلت له ان الجهل ويا العبط
بلف ويدوور
وان الضلمة عملت
حرب ع النور
وسمعت ما نقولش "ساندوتش"
لأنه كُفر الكفور
ونأكل الطازج ما بين
شاطر ومشطور
وبلاش "بارفان" ونتعطر
بمسك وكافور
قال لى يا سلام لما نهتم
فقط بالقشور
وقلت له فاكر لما كنت
فى الأتوبيس محشور
سرقوا منك هندمتك وكرامتك
وانت ليهم مشكور
هدموا استقرارك وسحلوا مرتبك
وبالصمت بقيت مستُور
صرخنا سوا بصوت فعلا
حزين مكسور
آه وآه وآه
يعنى نرمى نفسنا تحت زلموكة
ولا كفاية علينا حنطور
والقعدة اليوم اتغيرت
وانكشف المستور
وقدرنا نخطى من فوق السور
وقدرنا كمان نشعر بعمق السرور
وحنفضل كده طول ما فيكِ يا مصر
شباب وقت الشدة بيثور
ليست هناك تعليقات:
إرسال تعليق